ទម្លាប់ធម្មតាជារៀងរាល់ឆ្នាំ ក្រោយពីព្រះសង្ឃកាន់ព្រះវស្សាអស់ត្រៃមាស ០៣ ខែ ព្រះភិក្ខុសង្ឃតែងបានអនុញ្ញាតឱ្យទទួលក្រាលគ្រងអង្គកឋិនកាលតាំងពីថ្ងៃ ១ រោចខែអស្សុជរហូតដល់ថ្ងៃ ១៥ កើតខែកត្តិកបញ្ចប់ដោយពិធីបុណ្យអកអំបុកនាថ្ងៃពេញបូណ៌មីដែលប្រជាពុទ្ធបរិស័ទថ្វាយប្រគេន ក្រៅពីត្រៃចីវរនៅមានគ្រឿងបរិក្ខារផ្សេងៗសម្រាប់ព្រះភិក្ខុសង្ឃប្រើប្រាស់ក្នុងត្រៃមាស ០៣ ខែតាមប្រពៃណី។បុណ្យកឋិនទាន គឺជាបុណ្យដ៏សំខាន់ប្រកបដោយអត្ថន័យខ្លឹមសារក្នុងព្រះពុទ្ធសាសនា។ ក្រៅពីសំពត់ត្រៃចីវរសម្រាប់ព្រះភិក្ខុសង្ឃក្រាលគ្រងនៅទាំងមានផ្កាប្រាក់ផ្កាមាសហៅថាស្លាធម៌អមត្រៃគ្រឿងបរិក្ខារដែលមិនអាចខ្វះបាន ដែលបានប្រជាពុទ្ធបរិស័ទនាំយកមកថ្វាយប្រគេនដល់ព្រះជំនុំសង្ឃ។
ដង្ហែអង្គកឋិនទាននៃវត្តកំពង់ជ្រៃកាលពីឆ្នាំ ២០២២។
នៅតាមបណ្តាវត្តពុទ្ធសាសនាគណៈមហានិកាយខ្មែរក្នុងខេត្ត ចាប់ពីថ្ងៃ ១ រោចខែអស្សុជព្រះសង្ឃចេញវស្សារហូតដល់ដល់ថ្ងៃពេញបូណ៌មីខែកត្តិកប្រជាពុទ្ធបរិស័ទជិតឆ្ងាយមានចិត្តជ្រះថ្លាតែងនាំគ្នាដង្ហែអង្គកឋិនទានចូលវត្តដើម្បីសាង កុសលផលបុណ្យ។ ឆ្នាំណាក៏ដូចឆ្នាំណាក្នុងរដូវបុណ្យកឋិនទាន នៅតាមវត្តគណៈមហានិកាយខ្មែរនីមួយៗតែងមានការរៀបចំទីតាំងវេទិកា ទទួលបដិសណ្ឋារកិច្ចដល់ម្ចាស់អង្គកឋិនទាន និងពុទ្ធបរិស័ទកាន់ផ្កាដង្ហែចូលវត្តដោយមានភ្លេងពិណពាទ្យ យក្ស ហនុមាន នាងកំពីងពួយនិងតា ឥសីស្លៀកសពាក់ស លាយលាំដោយគ្រឿងសម្លៀក បំពាក់លក្ខណៈនារីខ្មែរ និងសិល្បករឆៃយុាំស្លៀកពាក់ចងក្បិន ពាក់អាវវៀលក្លៀកឬដៃខ្លី អាវពណ៌ ស ខៀវ លឿងពព្លាក់ពព្លូច...របាំងមុខក្រមិចក្រ មើម ខ្លះមាត់វៀច ខ្លះមាត់ច្រហ ខ្លះពេប ខ្លះសើច របស់របាំឆៃយុាំតែងសម្ដែងចង្វាក់ស្គរ ចាក់ក្បាច់តាមបែបក្បាច់គុនល្បុក្កតោរហ័សរហួនបែបត្លុក កំប្លែងយ៉ាងសប្បាយ រីករាយញុាំងឱ្យបរិយាកាស បុណ្យកឋិនទានកាន់តែឧឡារិកអធិកអធ័ម។ ញុាំងឱ្យបរិស័ទឱ្យកាន់តែមានសទ្ធាជ្រះថ្លាក្នុងព្រះពុទ្ធសាសនា។
ថ្វីត្បិតតែការធ្វើបុណ្យកឋិនទានភាគច្រើនស្ថិតលើស្ថានភាពលក្ខណៈសេដ្ឋកិច្ចរបស់គ្រួសារនីមួយៗ ក៏ពិតមែនប៉ុន្តែពិនិត្យរួម អង្គកឋិនទានរបស់ជនរួមជាតិខ្មែរក្នុងខេត្តតែងអភិរក្សបានលក្ខណៈវប្បធម៌ប្រពៃណីរបស់ពុទ្ធសាសនាគណៈមហានិកាយខ្មែរដែរ៕ រតនា
.gif)
