កំណាព្យ

                                                                 ដោយ៖ ឡឹម ថឹង

ពាក្យនេះពាក្យពិតពីបុរាណ​​​                                      ទុកជាលំអានចាំជីវិត

រស់នៅរៀនសូធ្យគួរខំគិត                                         លក្ខណៈត្រូវឋិតប្រាំប្រការ ។

ផ្លែឈើនោះន័យតាមធម្មជាតិ                                   ប្រែប្រួលមិនឃ្លាតតាមពាក្យថា

ដំបូងចេញក្តឹបរួចកាលណា                                        លុះយូរមាសាប្រែជាចាស់ ។

ស្រគាលទុំលឿនតាមវេលា                                          ផ្លែនោះធានាប្រាកដណាស់

រសជាតិផ្អែមឆ្ងាញ់ពិសាច្បាស់                                      មិនប្រែក្រឡាស់ធាតុផ្សេងឡើយ ។

យ៉ាងណានោះមិញជាតិជាមនុស្ស                                 ធ្វើកុំឲ្យខុសព្រោះកន្តើយ

លក្ខណៈផ្លែឈើលំដាប់ហើយ                                         មិនត្រូវព្រងើយគួរធ្វើតាម ។

រៀនសូធ្យអ្វីៗរៀនពីទាប                                          ឡើងខ្ពស់ថ្នាក់ប្រៀបជាប្រចាំ

មិនបង់បោះចោលភាពហាមប្រាម                           តាមពាក្យបណ្តាំលោតហួសថ្នាក់ ។

គង់ដូចកិច្ចការមុនធ្វើអ្វី                                         ស្ទង់ស្ទាបសំភីកុំអួលអាក់

ក្តាប់ដឹងការងារបានជាក់លាក់                                 ទើបគ្មានគ្រោះថ្នាក់ដល់អង្គប្រាណ ។

សេចក្តីប៉ុណ្ណឹងសូមរំលឹក                                            ធ្វើអ្វីគួរនឹកមុនក្រោយបាន

ពីតូចដល់ធំមាសកល្យាណ                                         កុំយកធំច្រានតូចចោលវិញ ៕