ឆ្នាំថ្មីស្រង់ព្រះឯផ្ទះ

- បងអើយស្រង់ព្រះទៅផ្ទះស្រង់ម្តាយ                          ស្រង់តាស្រង់យាយមានគុណថ្លៃថ្លា

សុគន្ធវារីស្រីអបដោយផ្កា                                          ស្រង់ស្របមេបាដូនតាចាស់ទុំ។

- តំណក់វារីភក្តីស្រីប្រុស                                            តាំងចិត្តដោយស្មោះឆ្ពោះគុណឧត្តម

គុណម្តាយឪពុកទំនុកថ្នាក់ថ្នម                                 ដូនតាបីបមគុណស្មើគិរី។

- ឆ្នាំថ្មីព្រះរស់យើងស្មោះបូជា                                     គោរពវន្ទាស្មាលាទោសពៃរ៍

កំហុសខុសឆ្គងសូមលោកអភ័យ                               ទទួលពរជ័យពីព្រះកន្លោង។

- ឆ្នាំថ្មីចូលមកជម្រកត្រជំ                                        ត្រជាក់ត្រីកុំពុំមានសៅហ្មង

កូនចៅហមហែថែព្រះកន្លោង                                  ថែម្លប់ផូរផង់សងគុណលោកហើយ៕

ពិធីងូតទឹកឪពុកម្តាយយាយតា។ រូបថត៖ សម្បត្តិ